Kanggo Bocah

Kanggo Bocah

Dening : Turiyo Ragilputra

Apa sliramu uga ora pengin/ methiki kembang mlathi/

ngronce-ngronce/ dadi kalung barleyan banget endah//

banjur dikalungake ing potrete ibumu/ kang banget aking?//

lemah padhas saya ora nate kambon banyu

lan kringet sing netes/ malah nuwuhake hawa sangar//

pancakara mbaka pancakara/ ngowahi lakune sejarah/

gilir gumanti/ bebendu lan pageblug/ nibani plataran iki//

apa maneh tembang alas gunung.  //Sedheng anak-anak

kepodhang/ banget kewuhan nemokake pang-pang eyub/

kanggo ajar lelumpatan lan jejogedan//

Ah, bokmenawa pangarep-arep iki/ mung pantes semi  jroning

angen-angen.//  Sadhela surem, sadhela maneh kerem/

utawa ilang bareng musnane guyu grapyak

bocah-bocah angon/ sing kekidungan sesulingan

merga ambu suket/ ing kalane grimis tumiba/

kabuncang angin tumuju poncoting kangungunan//

Padhang rembulan sing lagi salingir kae//

sing biyen setya tuhu/ nunggoni kembang desa adus ing kali/

sinambi rengeng-rengeng nembang kidung mangsa kala//

semune/ lagi martakake anane tangis nelangsa//

bumi sing saya tuwa,/ jaman sing saya wuda//

O, wis ora ana maneh/ tembang-tembang dolanan//

Apa maneh/ jejaka nglamar kekasihe nganggo guritan//

wis ilang gandane rambut wangi/ merga anyese banyu kali//

wis ilang sumerbake lulur warangan/ saka wanita pingitan//

Saiki/ ana sagagang sing durung kapethik//

bok menawa/ kowe bisa nggoleki dununge//

nanging/ bok menawa uga ora bisa.// awit selawase

kenangan lan kenangan tansah lunga teka//

lan kabeh/ mung gumantung marang kekudangan/

lumantar beninge oceh kukila//